Nuk rinovoi me skuadrën e Kukësit, por kjo nuk e ka penguar Agim Ibraimin që të gjejë një skuadër tjetër në Kategorinë Superiore. 32-vjeçari do të vazhdojë të jetë pjesë e Superiores, kësaj radhe si një futbollist i Dinamos. Ishte folur prej ditësh për një lëvizje të tillë, por vetëm sot ka mbërritur zyrtarizimi: Ibraimi është blerja më e fundit e 18 herë kampionëve të Shqipërisë.
Njoftimi është bërë nga klubi kryeqytetas, që nëpërmjet rrjeteve sociale ka zbuluar zyrtarizimin e marrëveshjes. Nga dita e nesërme, mesfushori do të vihet në dispozicion të trajnerit Shkëmbi në përgatitjet për sezonin e ri.
Njoftimi i klubit:
Agim Ibraimi, afrimi rradhës tek Dinamo
Futboll Klub Dinamo zyrtarizon afrimin e rradhës, Agim Ibraimi.
Mesfushori 32-vjeçar me një karrierë të pasur jashtë vendit dhe së fundmi një eksperiencë në Superiore, bashkohet nesër me skuadrën për tu vënë në urdhrat e trajnerit Shkëmbi.