"Unë kurrë nuk kam folur për një lojtar që nuk është i Realit dhe nuk do ta bëj kurrë. Ne i respektojmë vendimet, por për ne është e qartë se çfarë duhet të mendojmë: përgatitjen mirë për finale”. Carlo Ancelotti likuidon kështu argumentin Mbappe, i cili refuzoi ofertën e madrilenëve dhe vendosi të qëndrojë me PSG-në, me rastin e ditës së medias të organizuar nga UEFA në kuadër të aktit të fundit të Champions League, të planifikuar për të shtunën më 28 maj në Paris kundër Liverpool.
"Nëse do të fitojmë, do të isha i pari që do të fitoja katër Champions, por e di shumë mirë se gjithçka mund të ndodhë në një finale - vazhdoi Ancelotti - nuk jam i fiksuar. Gjëja më e rëndësishme është të mendosh ditë pas dite, të përgatitesh për ndeshjen. Rekordet individuale? Kur të ndalem, mund të them se kam fituar katër Champions League, por tani, nuk është se jam i fiksuar pas kësaj. Aspak”.
Dhe përsëri: "Skuadra është mirë. Shumë do të luajnë finalen e tyre të pestë. Nuk kam pse t'u shpjegoj asgjë këtyre lojtarëve, skuadra është më e përgatitur se të gjithë për të luajtur këto lojëra. Nëse kjo apo finalja e 2014 është më e veçantë? Në 2014 ishte ndryshe. Kishte më shumë presion se tani, Real Madridi nuk kishte fituar prej kohësh, ishte pothuajse një obsesion. Tani ekipi është i motivuar, por me më pak obsesion, kjo mund të japë një avantazh”.
Liverpool dhe Ancelotti, një sfidë e pafund. "Jemi takuar shumë herë. Në vitin 1984 u dëmtova dhe ishte një tragjedi që humba finalen në Romë. Ishte një tragjedi edhe në 2005. Unë u hakmora në 2007 dhe tani përsëri... - pranoi Ancelotti - Është një klub që unë e respektoj shumë. Gjithashtu miqtë e mi nga Milani më kërkojnë të fitoj që të mos i arrijnë në shtatë Champions League”.
