Një sezon që kishte nisur në mënyrë të shkëlqyer, si me Kombëtaren kuqezi, ashtu edhe me Sauthemptonin, aty ku është huazuar nga klubi mëmë, ai i Çellsit, kanë bërë që Armando Broja të shihet si premtimi i madh i futbollit shqiptar. Madje mediat kishin nxituar ta projektonin atë si një nga kandidatët potencialë për të zgjidhur krizën e shënimit të golave tek blutë londinezë, të paktën për sezonin e ardhshëm. Dhe, në fakt, statistikat u jepnin të drejtë mediave, teksa 20-vjeçari kishte realizuar 6 gola deri në 10-ditëshin e parë të shkurtit të këtij viti, çka e bënte atë shënuesin e 3-të më të mirë të skuadrës së njohur me nofkën “Shenjtorët”, ndërkohë që kishte realizuar edhe dy herë në Kupën e Ligës Angleze, por edhe 3 herë me fanellën e përfaqësueses kuqezi, 3 gola që kishin vlejtur fitoren dhe kishin ndezur shpresat e Shqipërisë në grupin e Eliminatoreve të Botërorit “Katar 2022”.
Por ai që ishte shpërfaqur si një premtim i madh, është fashitur shpejt, sepse, përtej përpjekjeve të tij, sulmuesi kuqezi nuk e gjen golin në Premier Ligën Angleze që nga 9 shkurti i këtij viti, në atë fitore 3-2 në fushën e Totenhemit, ku Broja realizoi të parin e skuadrës së tij. Ai e ka gjetur rrugën e rrjetës vetëm një herë që nga ajo kohë, por goli erdhi atë fitore 3-1 në Kupën e Anglisë (FA Cup), më 2 mars 2022, ku shqiptari shënoi të 3-tin për skuadrën e tij. Që nga ajo kohë, vetëm disa përpjekje për të shënuar apo për të shërbyer për shokët e skuadrës dhe asgjë tjetër.
Golat kanë shteruar edhe në frontin kuqezi, aty ku përtej atij shpërthimi të bujshëm me dy golat e dy fitoreve minimale me Hungarinë, si në Tiranë, ashtu edhe në Budapest, dhe me një gol në fitoren 5-0 ndaj San Marinos, Broja e ka harruar paskëtaj shijen e tundjes së rrjetës së portave kundërshtare. Polonia, Spanja dhe Armenia shënojnë shifrën 0 të golave të realizuar nga Armando Broja me fanellën kuqezi, përtej shkëndijave të shpërthimit në lojën e tij, por që nuk ndezën dot zjarrin e golave.
Në Premier Ligë, Sauthemptoni i të riut shqiptar ka edhe 4 ndeshje për të luajtur, që paraqesin një mundësi për Brojën për t’u ritakuar me golin, një ritakim që padyshim është i nevojshëm për të, teksa merkato e verës po afron.