F1, Çmimi i Madh i Spanjës: Hemilton niset i pari, Verstapen e ndjek

Ashtu siç kishte ndodhur në provat e lira, edhe në provat zyrtare të Çmimit të Madh të Spanjës, ka patur përmbysje të njëpasnjëshme sa u përket kohëve të shpejta, duke përcaktuar edhe radhën e nisjes për garën e së dielës. Dhe Ljuis Hemilton do të niset i pari me “Mercedes”-in e tij, pasi ka dhënë kohën më të shpejtë, 1 minutë, 16 sekonda e 741 të qindtat, duke siguruar kështu edhe për të 100-ën herë në karrierë, një rekord absolut ky në Formula 1, nisjen nga vendi i parë.

Piloti britanik synon fitoren e 3-të në këto 4 gara të para, duke kërkuar edhe shkëputjen në krye të renditjes së përgjithshme. Në krah të tij në garën e së dielës do të niset rivali i tij, Maks Verstapen, që ishte me “Red Bull|-in e tij vetëm 36 të mijëtat më i ngadaltë.

Ndërsa në radhën e dytë do të rreshtohet piloti tjetër i “Mercedes”-it, Valteri Botas, dhe ai i “Ferrari”-t, Sharl Lëklerk. 10-shen e të parëve do ta plotësojnë Sebastian Okon, Karlos Sainz, Daniel Riçiardo, Serxhio Perez, Lando Norris dhe Fernando Alonso. Sikundër këto prova zyrtare, që erdhën drejtpërdrejt për sportdashësit drejtpërdrejt në RTSH Sport, edhe gara e Çmimit të Madh të Madh të Spanjës do të sillet të dielën pasdreke drejtpërdrejt nga Rrjeti i Radio-Televizionit Shqiptar, në kanalin RTSH 1.