Federata Ndërkombëtare e Automobilizmit (FIA), pritet të vërë në zbatim një program më të rreptë për sigurinë e pilotëve, sidomos për atë që njihet si “roll hop”. Bëhet fjalë pjesën që ndodhet pas sediljes së makinave të Formulës 1, mbi kokën e pilotit, e cila është vendimtare në rast të përmbysjes së makinës, pasi është e para që bën kontakt me asfaltin.
Organizmi që qeveris automobilizmin botëror ka premtuar një rishikim të testeve që bëhen për këtë qëllim, sidomos pas aksidentit të Zhu Guanjusë në Çmimin e Madh të Britanisë së Madhe, ku pjesa e mbi kokën e tij u thye për shkak të përplasjes me asfaltin me një forcë që nuk ishte hasur më parë. Për këtë arsye, “Alfa Romeo” po punon që nga ajo kohë ngushtë me FIA-n, ndërsa skuadrat e tjera janë konsultuar për të marrë edhe reagimin e tyre dhe për të rishikuar rregulloret përkatëse.
Në fakt, vetëm “Alfa Romeo” ka mbetur skuadra që përdor një model të veçantë të kësaj pjese të makinës dhe vetëm makinat e saj e kanë patur këtë problem. Megjithatë, sikundër e pranoi edhe drejtori teknik i skuadrës së “MekLaren”-it, Xhejms Ki, forca që u vërejt në aksidentin e Zhusë nuk ishte hasur më parë në aksidentet të ngjashme.
“Ai ishte një episod mjaft i frikshëm, duke patur parasysh rrethanat, dhe diçka e tillë gjithmonë do të çojë në përfundime të reja nga këndvështrimi i sigurisë dhe kjo është ajo që FIA dhe skuadrat po diskutojnë në vijim për vitin e ardhshëm”, - ka deklaruar ai, ndërsa ka pohuar mundësinë që të ketë teste shtesë për këtë qëllim, por edhe kosto shtesë për skuadrat që duhet të modifikojnë edhe shasitë.
