Singapori ka qenë stacioni i radhës së Botërorit të Formulës 1, aty ku është zhvilluar gara e 16-të e kalendarit, por që në fakt ishte e 15-ta në pistë. Dhe, pasi ka mbizotëruar në dy seancat e para të provave të lira, të mbajtur të premten dhe në atë të 3-tën, të zhvilluar të shtunën, por edhe në provat zyrtare të së shtunës, ka qenë “Ferrari” që ka bërë nisjen më të mirë në pistën e “Marina Bej”-it, teksa Karlos Sainz e ruajti vendin e parë, ndërsa shoku i tij i skuadrës, Sharl Lëklerk, fitoi duelin e kthesës së parë me rivalin e “Mercedes”-it, Xhorxh Rasëll.
Logan Serxhent është përplasur me muret rrethuese në kthesën e 8-të të xhiros së 21-të, dhe është Rasëll që vihet në ndjekje të Sainzit, kur gara vazhdon me regjim normal, ndërsa në xhiron 44-të, edhe Sebastian Okonin, që e lë në baltë makina teksa ishte në vendin e 6-të dhe gara vijon nën drejtimin e makinës virtuale të sigurisë. Me rikthimin në normalitet të garës, një xhiro më pas, Sainzi vazhdon të kryesojë, tanimë i ndjekur nga Lando Norris dhe Lëklerku, ndërsa pas tyre janë dy pilotët “Mercedes”-it, Rasëll dhe Hemilton, të cilët bënë nga një ndalesë për të vendosur gomat e ndërmjetme.
Dhe, teksa ka bërë padyshim garën e jetës së tij, edhe pse me goma tejet të konsumuara, Karlos Sainz ia ka dalë të mbërrijë i pari në vijën e finishit, i ndjekur nga fare afër nga Lando Norris i “MekLaren”-it, ndërsa vendin e 3-të e ka marrë veterani Ljuis Hemilton, i cili ka përfituar nga gabimi i shokut të tij të skuadrës, Xhorxh Rasëll. Ky i fundit e humbi përqendrimin pikërisht në xhiron e fundit, reksa mbante vendin e 8-të, duke goditur muret rrethuese të pistës. Ashtu sikundër provat zyrtare të së shtunës, edhe gara së dielës erdhi drejtpërdrejt në Rrjetin e Radio-Televizionit Shqiptar, në RTSH 1 dhe RTSH Sport.
