E nisi sezonin me një barazim ndaj Erzenit dhe një me Partizanin, por pas javës së katërt e shikon veten në grupin e skuadrave të kreut. Bëhet fjalë për skuadrën e Laçit, që nën drejtimin e trajnerit Bejzade ka siguruar fitoren e dytë radhazi, duke mposhtur Vllazninë me përmbysjë, 2-1 në këtë javë të katërt të Superiores.
Një sfidë që nisi mirë për skuadrën e Vllaznisë në fakt, e cila arriti të gjejë rrugën e rrjetës që në minutën e 3-të me anë të Boshnjakut, që arriti të mposhtë portierin Dajsinani me një gjuajtje me kokë. Kurbinasit nga ana e tyre rritën ritmin e lojës me kalimin e minutave dhe në fundin e pjesës së parë barazuan me anë të Soboëale.
Edhe në pjesën e dytë vendasit u shfaqën më kërkues dhe në minutën e 82-të arritën të shënojnë dhe golin e fitores me të riun Tresa, i cili erdhi nga stoli për të siguruar tri pikët. Me këtë fitore Laçi ngjitet në kuotën e 7 pikëve dhe pozicionohet në vendin e dytë, ndërsa Vllaznia mbetet në vendin e pestë me 5 pikë.
