Në vigjilje të Çmimit të parë të Madh të Botërorit të Formula 1, Charles Leclerc doli para gazetarëve duke thënë se këtë sezon Ferrari futet me objektivin e vetëm për të fituar titullin, çmimin që i mungon prej plot 16 vitesh.
“Të gjithë jemi të motivuar, kemi punuar shumë në Maranello dhe mezi pres që të nisim sezonin”, nisi fjalën e tij Charles Leclerc. “Shkojmë në pistë me qëllimin që të përmirësojmë pozicionin e arritur vitin e kaluar pra këtë vit duam vendin e parë. Ndjesia e fitores më motivon shumë prandaj duam që këtë ëndërr ta kthejmë në realitet”, vazhdoi monegasku.
Në fjalën e tij ai komentoi edhe mbi konkurencën duke thënë se ishte “Aston Martin” makina që e kishte surprizuar më shumë. “Ishte surpriza e testit tre ditorë që u mbajt në Bahrein duke konfirmuar kështu se në Botërorin e ri do të renditet pranë Red Bull dhe Mercedes”, pohoi Charles Leclerc. Në fund të fjalës të tij pranoi se pilotët për tu mundur ishin “Hamilton, Verstappen dhe Alonso”.
Magjinë e Formula 1 do të keni mundësi ta ndiqni vetëm nëpërmjet Radio Televizionit Shqiptar duke filluar me Çmimin e Madh të Bahreinit.