Pritja po mbaron dhe shumë ekipe të MotoGP po organizojnë prezantimin e motorrëve për kampionatin botëror. Të parët që njoftuan datat ku do të bëhen prezantimet ishin Ducati dhe Yamaha.
Janë Jack Miller dhe Francesco Bagnaia, që do të ngjiten në skenë më 9 shkurt. Të dy pilotët, të cilët kaluan në bllok nga Pramac te skuadra Factory Ducati, do të shfaqen me ngjyrat e kuqe dhe do të “rrëmbejnë” trashëgiminë e Andrea Dovizioso dhe Danilo Petrucci. Një javë më vonë, saktësisht në 15 shkurt, do të jetë radha e Yamaha. Maverick Viñales do të hapë dyert e Iwata për Fabio Quartararo në ekipin e Monster Energy.
Prodhuesi japonez, gjithashtu do të zhvillojë një formacion të nivelit të lartë me Petronas ku Valentino Rossi do të bashkohet me mikun dhe nxënësin e tij, Franco Morbidelli, fitues i tre Grand Prix në 2020 dhe nënkampion i botës. Të dyja ngjarjet do të zhvillohen në modalitetin virtual, me orarin që akoma nuk është vendosur.
