Partizani i Xhovani Kolelas me një dorë tek titulli kampion. Fitorja me përmbysje ndaj Kastriotit në “Elbasan Arena”, kjo në ndeshjen që erdhi drejtpërsëdrejti në rrjetin e Radio Televizionit Shqiptar, si dhe barazimi i Tiranës në Rrogozhinë ndaj Bylisit, 2-2, vendos në vendin e parë Partizanin. Sepse një javë përpara përfundimit të kampionatit, edhe pse janë në të njëjtën kuotë pikësh 64, Partizani është më i favorizuar se Tirana në ndeshjet direkte.
Në fakt ndeshja ka nisur me befasi të madhe për Partizanit, teksa Bedri Greca kalon Kastriotin në avantazh në të 8’. Madje skuadra e Emiljano Çelës ishte pranë golit të dytë në të 23’, por për fatin e keq si Rexhinaldo, ashtu dhe Selmani ndalen nga shtylla. Dhe Partizani nis të marrë frymë, ndërsa Rrapaj në të 39’ gjen golin e barazimit me një goditje potente nga rreth 20 metra, teksa e dërgon topin në të djathtë të Salit. E në fundin e pjesës së parë është Da Silva që vendos avantazhin e Partizanit.
Kastrioti e nis me zëvendësime pjesën e dytë, madje duke larguar Salin dhe aktivizuar Malajn. E zëvendësimet nuk është se rrisin nivelin e lojës së krutanëve. Përkundrazi Partizani nuk fal, ndërsa Murataj realizon golin e tretë në të 58’, pas kthimit të topit nga Malaj në një pritje jo fort të sigurtë. Pas gjashtë minutash, Da Silva, me krosimin nga këndi të Rrapajt, shënon dygolëshin e tij personal dhe golin e katërt për Partizanin. Në të 69’, kjo dhe pas verifikimit në sistemin VAR, anullohet goli i pestë i Partizanit për faull në zonën krutane. Kastrioti kërkon golin e nderit, por Greca e më pas Zogaj ndalen nga shtylla. Në vërshëllimën e fundit të Kreshnik Cjapit, Partizani merr trepikë që e dërgojnë më pranë titullit kampion të shtatëmbëdhjetë në historinë e klubit të kuq.
Në ndeshjet e tjera, Teuta ka mundur Egnatian, 1-0, kurse Kukësi e Vllaznia janë ndalur në barazim 0-0 me Erzenin dhe 1-1 me Laçin. E tanimë në javën e fundit, Teuta, Vllaznia e Laçi luajnë për një vend në Europë, kurse Kukësi e Erzeni për të shmangur Play-out.
