Prishtina dhe Feronikeli nuk kanë shkuar më shumë se një barazim pa gola në sfidën hapëse të javës së 15-të të Superligës së Kosovës. Ndeshja nisi me një minutë heshtje në nderim të ikonës së FC Prishtinës, Shefqet Sinani, i cili ka ndërruar jetë në moshën 65-vjeçare.
Një 90 minutësh i plogësht, me shumë pak raste në portat respektive, por mundësinë më të mirë për shënim e kishin vendasit, që në minutën e 13-të takimit fituan një 11-metërsh, por Lilaj u ndal nga portieri Avdyli i Feronikelit.
Ndërkohë, skuadra që drejtohet nga Klodian Duro, goditi traversën në pjesën e parë, në dy mundësi që krijoi, por pa arritur të mposhtë portierin Haxho. 90 minuta dhe 0-0, që për vendasit nuk është pritur aspak mirë, gjë e cila u tregua qartë nga trajneri Zekirija Ramadani, që deklaroi: “Nuk jemi të kënaqur me rezultatin. Nuk mund të them që luajtëm mirë, por nuk morëm rezultat. Na duhej fitorja, sepse kemi lënë shumë pikë gjatë rrugës. E kishim në dorë, e kishim penalltinë, e cila nuk është as e para dhe as e fundit që humbet”.
