Ndonëse nuk ka ende një kandidaturë zyrtare, vijojnë spekulimet në mediat rreth emrit të ri të trajnerit të ri të përfaqësueses së Kosovës. Dhe, së fundi, nga mediat e Prishtinës mësohet se trajneri i njohur italian, Roberto Donadoni ka shprehur interesim ta drejtoj përfaqësuesen e Kosovës në futboll. Madje mediat raportojnë se Federata e Futbollit të Kosovës, (FFK) tashmë është në bisedime me 58-vjeçarin e lindur në Bergamasko të Italisë. Në fakt, pas një karriere të suksesshme si futbollist me Milanin, por edhe me Italinë përgjatë dy dhjetëvjeçarëve të fundit të mijëvjeçarit të shkuar, ai ka bërë edhe detyrën e trajnerit në dy dhjetëvjeçarët e parë të mijëvjeçarit të ri, kryesisht në Itali, duke arritur kulmin me dyvjeçarin 2006-2008, kur ai drejtoi përfaqësuesen axurre.
Një tjetër italian dhe një njohje e vjetër e futbollit në trevat shqiptare, Xhovani de Biazi, që kryen hëpërhë detyrën e trajnerit të Azerbajxhanit, është vetëofruar për stolin e përfaqësueses së Kosovës, duke patur si referencë suksesin e tij në krye të Kombëtares kuqezi, të cilën e udhëhoqi drejt fazës finale të Evropianit “Francë 2016”. Më së fundi, edhe Aleksandër Frai është përfolur si kandidaturë e mundshme për të qenë trajneri i ardhshëm i Kosovës.
Krahas shumë emrave për të marrë postin e skuadrës së “Dardanëve”, kandidati i radhës mund të jetë pikërisht ish-futbollisti i njohur. Kështu ka shkruar të premten gazeta zvicerane “Blick”. 42-vjeçari Frai është hëpërhë trajner i skuadrës së FC Vilit, që militon në kategorinë e dytë të futbollit zviceran. Më herët ka udhëhequr skuadrat e grupmoshave të reja të Bazelit, për t’u bërë trajner i përkohshëm i ekipit të parë të Baselit në vitin 2018.
Ende nuk ka asnjë reagim nga Federata e Futbollit të Kosovës (FFK), e cila, mesjavën e shkuar, ka ndërprerë bashkëpunimin me trajnerin e përfaqësueses, Bernard Shalondë. Të martën e shkuar, Kosova u mund 1-2 në Prishtinë nga Gjeorgjia, duke pësuar humbjen e 5-të në këto Eliminatore dhe duke zbritur në vendin e fundit të renditjes së grupit B të Eliminatoreve të Botërorit “Katar 2021”.
