Edhe niveli më i lartë i Kampionatit të Futbollit në Kosovë, Superliga, ka hyrë në fazën e 4-t dhe të fundit të sezonit të saj, teksa në fundjavë janë luajtur ndeshjet e javës së parë të kësaj faze, asaj të 28-të. Dhe Ballkani ka bërë detyrën të shtunën, duke fituar me një gol të vetëm në fushën e Dukagjinit dhe duke ruajtur epërsinë në krye të renditjes. Skuadra nga Suhareka, e drejtuar nga trajneri nga Tirana, Ilir Daja, është në kuotën e 60 pikëve pas 28 ndeshjesh të luajtura, 8 pikë sesa dy ndjekëset më të afërta, Drita dhe Gjilanit.
Dy rivalet qytetase ndajnë vendin e dytë dhe të 3-të, me nga 52 pikë secila, teksa korrën në fundjavë fitore identike. Të shtunën, Gjilani fitoi 5-0 në fushën e vet ndaj Drenicës së Skënderajt, ndërsa të dielën, Drita mposhti me të njëjta shifrat në fushë të huaj Feronikelin. Për Gjilanin, ky ishte një rikthim tek fitorja pas 3 barazimesh dhe një humbjeje në 5 ndeshjet e fundit, ndërsa për Dritën, ishte fitorja e 3-të radhazi. Fitore në fushë të huaj ka korrur edhe Llapi, që mposhti 2-0 Ulpianën, kurse kampionia në fuqi, Prishtina, vuajti për të mposhtur në fushën e vet Malishevën me shifrat 3-2.
Llapi mban vendin e 4-t, me 44 pikë, 6 më tepër sesa Prishtina e vendit të 5-të. Drenica me 35, Malisheva me 34 dhe Dukagjini me 30 pikë duket se janë skuadrat që do të luftojnë për të shmangur vendin e 8-të të renditjes, që të çon në “play-off”-in e mbijetesës, ndërsa Feronikeli i vendit të fundit, me 12 pikë, dhe Ulpiana e vendit të parafundit, me 20, duken të dorëzuar tashmë në përpjekjet e tyre për të shmangur rënien nga Kategoria.
09/04/2022
Gjilani 5 - 0 Drenica
Dukagjini 0 - 1 Ballkani
10/04/2022
Prishtina 3 - 2 Malisheva
Ulpiana 0 - 2 Llapi
Feronikeli 0 - 5 Drita
1 Ballkani 28 18 6 4 60
2 Drita 28 15 7 6 52
3 Gjilani 28 13 13 2 52
4 Llapi 28 12 8 8 44
5 Prishtina 28 10 8 10 38
6 Drenica 28 10 5 13 35
7 Malisheva 28 9 7 12 34
8 Dukagjini 28 6 12 10 30
9 Ulpiana 28 5 9 14 24
10 Feronikeli 28 3 3 22 12