Vllaznia ka njoftuar lëvizjen më të fundit: është larguar Elvis Plori dhe në vendin e tij është emëruar Mirel Josa. Kuqeblutë kanë bërë të ditur se është vendosur me mirëkuptim largimi i Plorit nga pozicioni i trajnerit të parë, ndërkohë që do të ketë një tjetër pozicion teknik në klub.
Menjëherë është zyrtarizuar trajneri i ri, një trajner me shumë eksperiencë si Mirel Josa. Një njohës shumë i mirë i Superiores, që tashmë do të ketë mundësinë të drejtojë kuqeblutë në këtë fundsezoni për të hedhur themelet për sezonin e ri.
Njoftimi i klubit:
Klubi i Futbollit Vllaznia ka vendosur t'i ofrojë te gjithe besimin dhe mbështetjen e duhur trajnerit të njohur dhe me eksperiencë Mirel Josa në drejtimin e pankinës kuqeblu. I urojmë fat dhe suksese në permbushjen e objektivave sezonale dhe në vazhdimësi në drejtimin e Vllaznisë. Mirë se erdhe MJESHTËR!
Klubi i Futbollit Vllaznia njofton se ka vendosur me mirëkuptim largimin nga pozicioni i trajnerit të pare Elvis Plorin. Falenderojmë trainerin Plori për të gjithë kontributin e dhënë gjatë ketyre 2 viteve për ringritjen e klubit tone dhe i urojmë shumë suksese ne sfidat e ardhshme në pozicionin teknik brenda klubit tonë.
