Sydney McLaughlin ka thyer rekordin botëror në 400 metra me pengesa me kohën e jashtëzakonshme 50”68, më shumë se gjysmë sekonde më e shpejtë se koha e mëparshme. 22-vjeçarja amerikane ka mbetur e shtangur teksa pasi ka kaluar vijën e finishit ka parë tifozët të brohorasin. Gara e saj ka qenë një kryevepër. Nuk bën asnjë gabim nga pengesa e parë deri e fundit me një ritëm të jashtëzakonshëm. Dhe 100.000 dollarët e fituar janë mëse të merituar. Ajo është fituese e medaljes së artë olimpike vitin e kaluar në Tokio, edhe atëherë me një rekord botëror. Por ajo që çuditi të gjithë menjëherë pas garës, ishte deklarata e saj kur u shpreh se në të ardhmen mund të ndryshojë disiplinë gare.
“Po mendojmë të ndryshojmë disiplinë gare. Nuk e di se kur do të ndodhë kjo. Do ta vendosim në fund të sezonit. Do të ndryshojmë disiplinë apo do të qëndrojmë në 400 metra me pengesa. Gjithsesi e kam lënë në duart e trajnerit tim vendimin” – tha McLaughlin. Amerikani Michael Norman është fitues i medaljes së artë në garën e 400 metrave. Ai arriti kohën 44”29. Tre herë medalisti olimpik James fitoi medaljen e argjendtë me 44”68 sekonda, ndërsa britaniku Mattheë Hudson-Smith mori medaljen e bronztë me 44”66.
Dy herë kampionia olimpike Miller-Uibo nga Bahamas më në fund fitoi medaljen e artë botërore në 400 metra në botërorin e Eugene duke nënshkruar kohën 49”11 sekonda. Ajo nuk mori pjesë në botërorin e Dohas në 2019 dhe në Lojërat e Tokios pas tre testeve të humbura të dopingut.