Verstapen, “zot shtëpie” edhe në Monza

Ka premtuar të jetë ndryshe, por në fund është përsëritur i njëjti refren që ka mbizotëruar në këtë se sezon të Formulës. Ishte shpresuar që “Ferrari” të dhuronte të papriturën e madh të këtij sezoni, teksa garohej në pistën e shtëpisë, e për më tepër që Karlos Sainz nisej nga vendi i parë, kurse Sharl Lëklerk nga i 3-ti e midis tyre ishte Maks Verstapen. Por, përtej një nisjeje premtuese dhe një shpirti luftarak të shpalosur nga piloti spanjoll i skuadrës italiane, Sainz, ëndrra e “Ferrari”-t në Çmimin e Madh të Italisë, në Monza, ka zgjatur për vetëm 15 xhiro, aq sa i është dashur Verstapenit për ta parakaluar, teksa makinat kanë nisur të bëjnë dallimin.

Me pilotin holandez të “Red Bull”-it që nuk e ktheu më kokën prapa deri në finish, beteja është zhvendosur tek vendi i dytë, aty ku Sainzi ka luftuar për afro 30 xhiro me Serxhio Perezin, por piloti tjetër “Red Bull”-it e parakalon “Ferrari”-n e spanjollit 5 xhiro para fundit, duke vulosur kështu një triumf të dyfishtë të skuadrës austriake në Monza.

E vetmja gjë për t’u shijuar për tifozët e “Ferrari”-t ishte një duel i ethshën i dy pilotëve të saj për shkallën e fundit të podiumit, aty ku Lëklerk kërcënoi t’ia rrëmbente, por nuk ia doli, sepse ishte Karlos Sainz që mori vendin e 3-të dhe shoku i tij i skuadrës u detyrua të kënaqej me vendin e 4-t. Si provat zyrtare të shtunës, ashtu edhe gara e së dielës në Çmimin e Madh të Italisë në Monza erdhën drejtpërdrejt në Rrjetin e RTSH-së.