Pas tri ndeshjeve ku kishte marrë vetëm një pikë(barazim me Egnatian, humbje me Kukësin dhe Tiranën), Vllaznia gjen fitoren në javën e nëntë duke mundur në “Loro Bori” Kastriotin me rezultatin 3-1. Një sfidë e dominuar nga kuqeblutë, të cilët asnjëherë nuk e vunë në diskutim fitoren. Që në minutën e 10-të të sfidës, shkodranët arritën të gjejnë rrugën e rrjetës duke e bërë gjithçka më të thjeshtë.
Është pikërisht Aralica, i cili ka përfituar nga një rrëmujë e krijuar në zonën krutane në momentin e ekzekutimit të një goditje këndi dhe tabela elektronike shënon 1-0 për Vllazninë. Sulmet e njëpasnjëshme të vendasve kurorëzohen me golin e dytë pas nëntë minutash, me Ardit Hoxhajn protagonist. Përsëri goditje këndi, përsëri goditje me kokë dhe Hoxhaj ka sigluar 2-0, duke e bërë më të besueshëm suksesin në këtë sfidë.
Pretendime, mundësi shënimi por dhe tension deri në përfundimin e 45 minutave të para, por rezultati nuk ndryshon, mbetet i mbërthyer në shifrat 2-0. Në pjesën e dytë, pikërisht në minutën e 56-të, nga një aksion i nisur nga e majta e sulmit, lind dhe goli i tretë për kuqeblutë. Është Hakaj që ka shërbyer për Hoxhajn dhe ky i fundit nuk fal, 3-0.
Në minutën e 76-të, Kastrioti ngushton shifrat me Ajazin, i cili përfiton dhe nga gabimi i portierit Zogoviç për të dërguar topin në rrjetë, 3-1. Por gjithçka mbaron këtu, pasi shkodranët arrijnë të administrojnë si duhet deri në fund dhe marrin kështu fitoren e parë pas tri ndeshjeve të kaluara ku nuk kanë munguar kritikat. Një rikthim i frikshëm, një sinjal për rivalët.
