Nuk ka fitues supersfida e javës së 20-të të Kategorisë së Parë. Mbyllet në barazim 1-1 përballja direkte mes Vorës dhe Besës, takim që u transmetua drejtpërdrejt në RTSH Sport.
Përfiton nga ky barazim Flamurtari, që mposhti 3-0 Kastriotin dhe tashmë vlonjatët qëndrojnë vetëm 2 pikë larg kreut të renditjes.
Besa luan mirë në shtëpinë e kryesuesve dhe kalon në avantazh me Spahiun në mesin e pjesës së dytë. Vora reagon duke barazuar shifrat me Shehin 10 minuta më vonë. Mbyllet pa fitues kryendeshja e javës në Kategorinë e Parë. Vora ruan vendin e parë, tashmë në kuotën e 48 pikëve, ndërsa Besa ngjitet në kuotën e 40 pikëve.
Në ndeshjen tjetër të ditës, që u transmetua në RTSH 2, Flamurtari nuk gabon në shtëpi dhe mposht me rezultatin e pastër 3-0 Kastriotin. Gjithçka vendoset në pjesën e dytë me Oshafin, që zhbllokon sfidën dhe më pas Ememe realizon një dygolësh.
Festojnë këtë javë vlonjatët që pas këtij suksesi ngjiten në kuotën e 46 pikëve dhe zvogëlojnë në vetëm 2 pikë diferencën me kryesuesit e Vorës. Gara për tu ngjitur në Abissnet Superiore mes tre skuadrave të kreut është më e bukur se kurrë.
