Shqipëria në futboll për femra për moshën deri në 17 vjeç ka pësuar humbjen e dytë në Ligën B, ndërsa në “Elbasan Arena” është mundur 3-0 nga Ishujt Faroe. Një lojë që ka patur skuadrën tonë më në kontakt me topin, por që i ka munguar fantasia dhe krijimi i rasteve për shënim. Tjetër gjë kundërshtari që nëpërmjet kundërsulmit godet dhe gjen golin në të 3’ me anë të Dalheim. Deri në fund të pjesës së parë ishte një administrim i mirë i avantazhit nga Ishujt Faroe.
Në pjesën e dytë, Zakariasdortir shënon dy herë. Fillimisht në të 51’, teksa u shfaq e vetme përballë portieres Mone dhe më pas në të 66’, kur e detyroi Stalajn të largonte topin përtej vijës fatale të portës kuqezi. Në vërshëllimën e fundit të Jermolevës, 3-0 për Ishujt Faroe, që ruajnë kryesimin në grupin B4, kjo falë golaverazhit më të mirë të Uellsit, që të hënën ka fituar 1-0 me Kazakistanin.
Të enjten, në të njëjtën orë 14:00, Kazakistan – Shqipëri dhe Uells – Ishujt Faroe për të mbyllur këtë raund të parë të Ligës B.
