Malisheva ishte fituesja e Kupës “Holta” në Gramsh, kjo në volejboll për vajza për moshën deri në 18 vjeç, e cila u zhvillua mes katër ekipeve. Përveç Malishevës në këtë aktivitet mori pjesë dhe Gramshi si organizatore e veprimtarisë, që erdhi në kuadrin e festimeve për 110-vjetorin e Pavarësisë, si dhe Elbasani dhe Kërçova.
Në ndeshjen e parë, Malisheva fitoi 2-0 me Gramshin, 25-9 dhe 25-20. Në ndeshjen e dytë, Kërçova mundi Elbasanin 2-0, 25-22 dhe 25-20. E për vendin 3-4, Elbasani mundi Gramshin, 2-0, ndërsa i fitoi setet në shifrat 25-15 dhe 25-13. Finalja ishte më e ekuilibruar, pasi Malisheva ka fituar 2-1 ndaj Kërçovës. 25-20 seti i parë për Malishevën. I dyti 25-12 për Kërçovën dhe në finale 15-12 për Malishevën, që kupën e ka marrë nga deputeti i Partisë Socialiste, Besmir Ajazi, si dhe kryetari i Bashkisë së Gramshit, Klodian Taçe. Një aktivitet që shtoi dhe më tepër miqësinë mes ekipeve.
