Olimpiakos mundi Barcelonën 77-70 në javen e 27-të duke rifituar kreun me bilancin 19-8 e kombinuar edhe me humbjen e Real Madrid. Ndërkohë Barcelona me bilancin 18-9 qëndron në vend të dytë. Katalanasit pësuan humbjen e parë pas 5 fitoresh rradhazi në Euroligë. Për skuadrën nga Pireu u dallua Mckissic me 16 pikë, Larentzakis me 15 pikë duke përfshirë 4/5 për tre pikë dhe Sasha Vezenkov me 14 pikë. Për Barcelonën u dalluan Nikola Mirotiç me 19 pikë dhe Laprovitola me 15 pikë. Partizan Beograd fitoi ndaj Virtus në Bolonja 88-79, dy skuadra që luftojnë për kualifikimin në play-off.
Dante Exum shënoi 17 pikë 7 topa në tabelë, 7 asist dhe 4 interceptime për skuadrën serbe dhe në fund trajneri i tyre Zelko Obradoviç do shprehej: “Mendoj se basketbolli ka nevojë për mbrëmje si kjo. Është shumë e veçantë për Euroligën. Ndeshja ishte e fortë dhe në e prisnim. Ndryshuam diçka taktikisht në pushim dhe në fund morëm avantazhin. Tifozët tanë që kishin udhëtuar për të na ndjekur në dhanë një shtysë të madhe dhe nuk kam fjalë që t’i falenderoj”. Përpara ndeshjes u nderua Pedrag Daniloviç i cili ka luajtur me të dy skuadrat ndërkohë që për Virtus Bolonjën ka luajtur nga 1992 deri në 2000 me një ndalesë në mes teksa luajti për Dallas dhe Majemi në NBA për dy sezone. Bayern Mynih mundi Lionin 76-72 e tashmë bavarezët me bilancin 11-16 kanë ende shpresë për kualifikim.
Ndërkohë që francezët me 9-18 nuk kanë më shpresë matematikisht për tu kualifikuar. Ndeshja ndoshta me emocjonuese u zhvillua në Madrid teksa Baskonia mundi Realin e Madridit 81-85 me një trepikësh nga Matt Costello në fund. I pyetur në fund për koshin e fitores Castello do shprehej: “Nuk e shihja koshin vetëm mbrojtësin tim që kisha përballë Rudi Fernandez”. Costello e mbylli me 20 pike ndërsa Thompson me 18 pikë për skuadrën baske. Për Real Madrid u dallua Xhanan Musa me 21 pikë. Tani madrilenët me 18-8 zbresin në vend të tretë por kanë një ndeshje më pak. Baskonia me 15-12 mban vendin e 6 dhe ka shanse të mira për tu kualifikuar.
