Mbrojtësi i kombëtares shqiptare, Marash Kumbulla ka dhënë një intervistë të gjatë për “rg.org”, ku ka folur për karrierën e tij dhe situatën aktuale që po kalon tek Espanjol.
Pavarësisht se u rrit në Itali, Kumbulla zgjodhi të luante për kombin e prindërve të tij: Shqipërinë.
“Kam luajtur për Shqipërinë që kur isha 15 vjeç dhe kur isha 19 vjeç, më duhej të zgjidhja mes Shqipërisë dhe Italisë në nivel të lartë. Edhe pse Italia donte që unë të luaja për ta, nuk kisha asnjë dyshim: e gjithë familja ime është nga Shqipëria, ndihem shqiptar dhe doja të luaja për kuqezinjtë. Kombëtarja është rritur shumë vitet e fundit për shkak të shumë lojtarëve që kishin zgjedhjen mes të luajturit për Shqipërinë dhe një komb tjetër dhe zgjodhën Shqipërinë. Shpresojmë, kjo do të motivojë fëmijët e tjerë që të marrin të njëjtin vendim në të ardhmen.”
Mbrojtësi ka folur edhe për aventurën e tij te Roma: “Kishte shumë presion. Roma është një ekip i madh në Itali, tifozët e të cilit kërkojnë shumë, por unë e shijova shumë kohën time në Romë dhe presioni, edhe në kohë të këqija, më ndihmoi të piqesha. Unë jam rritur shumë nën Mourinhon për sa i përket karakterit dhe mentalitetit tim – ai të tregon të vërtetën në fytyrë. Ai të ndihmon ta shohësh futbollin në një mënyrë tjetër dhe kjo e bën më të lehtë të luash në një nivel më të lartë”.
I dëshpëruar për një mundësi të re, ai u huazua te Sassuolo në janar 2024, ku luajti vetëm shtatë herë. Ishte shumë e qartë se Kumbulla duhej të largohej nga Roma në mënyrë që të kthehej në maksimumin e tij. Skuadra të ndryshme italiane si Parma, Empoli dhe Cagliari kërkonin shërbimet e tij, por në vend të kësaj, ai zgjodhi të shkonte drejt perëndimit për në Spanjë, duke iu bashkuar Espanyol-it në një huazim një sezon.
“Tek Espanjoli kam gjetur një atmosferë ku më duhet të mendoj vetëm për atë që po ndodh në fushë dhe mund të përqendrohem në çdo detaj. Stërvitem çdo ditë për t'u përgatitur për çdo ndeshje. Pas një viti e gjysmë rikuperimi nga dëmtimi, isha pak në dyshim, por tani ndihem shumë mirë si fizikisht ashtu edhe mendërisht. Më në fund ndihem sërish si vetvetja si futbollist”, ka thënë mes të tjerash Kumbulla.
