Kategoria Superiore është në prag të javës së parafundit, e cila do të zhvillohet e gjitha ditën e mërkurë duke nisur nga ora 16:00. Por gjithsesi edhe pse është fundi i sezonit, sërisht skuadrat e elitës së futbollit shqiptar nuk i kanë shpëtuar “darës” së ndëshkimeve të Komisionit të Disiplinës.
Kështu Laçi, Tirana, Bylis për sjellje të gabuar të tifozëve janë gjobitur me 200.000 – 500.000 lekë. Është ndëshkuar me 8 javë pezullim Grent Halili për sjellje të gabuar ndaj zyrtarit të ndeshjes në takimin ndaj kurbinasve.
Ndërkohë në Kategorinë e Parë e ka pësuar Joanison i Besës, që është ndëshkuar me 5 javë pezullim për sulm ndaj kundërshtarit. Nuk kanë munguar dënimet dhe në futbollin e femrave. Kjo që nga presidenti i Vllaznisë, Lazër Matija, që është dënuar me 8 ndeshje për sjellje të gabuar ndaj zyrtarit të ndeshjes e deri tek lojtarja e Kinostudios, Melisa Doçe, që për sulm ndaj kundërshtarit është pezulluar pesë javë. Po kështu dënime dhe tek moshat, ndërsa Disiplina vijon të dënojë javë pas jave të gjitha kategoritë.
VENDIMET:
1. KF Laçi, për sjellje të gabuar të spektatorëve duke hedhur sende në terrenin sportiv, në bazë të nenit 65/1 dhe 65/3/c të KDS, dënohet me gjobë në masën 50.000 (pesëdhjetë mijë) lekë.
2. KF Tirana, për sjellje të gabuar të spektatorëve duke hedhur sende në terrenin sportiv, në bazë të nenit 65/2 dhe 65/3/c të KDS, dënohet me gjobë në masën 200.000 (dyqind mijë) lekë.
3. Zyrtari i KF Tirana, Grent Halili, për sjellje josportive ndaj zyrtareve te ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
4. KF Bylis, për sjellje të gabuar të spektatorëve duke hedhur sende në terrenin sportiv, në bazë të nenit 65/1 dhe 65/3/c të KDS, dënohet me gjobë në masën 200.000 (dyqind mijë) lekë.
5. Lojtari i KF Bylis, Santos Oliver Joanisson, për sulm ndaj kundërshtarit, në bazë të nenit 47/1/e të KDS, dënohet me 5 (pesë) ndeshje pezullim nga të gjitha aktivitetet.
6. Zyrtari i KF Vllaznia Femra, Lazer Matija, për sjellje josportive ndaj zyrtareve te ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
7. Lojtarja e FC Kinostudio Femra, Melisa Doce, për sulm ndaj kundërshtarit, në bazë të nenit 47/1/e të KDS, dënohet me 5 (pesë) ndeshje pezullim nga të gjitha aktivitetet.
8. Zyrtari i KF Teuta U-19, Ilir Biturku, për sjellje josportive ndaj zyrtareve te ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
9. Zyrtari i KF Vllaznia U-17, Denis Zmijani, për sjellje josportive ndaj zyrtareve te ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
10. FC Dinamo U-15, për aktivizimin e një lojtari që nuk kishte të drejtë të luante në ndeshjen e vlefshme për Kampionatin Kombëtar të Kategorisë së Parë U-15, kundër Studenti U-15, në bazë të neneve 30/3 dhe 53 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
