Me një gol të Lleshit dhe një të Ze Gomes skuadra e Elbasanit ka likuiduar Skënderbeun në Korçë. Ekipi i drejtuar nga një ish si Ivan Gvozdenoviç ka mundur që të fitojë tri pikë shumë të rëndësihme në një fushë të vështirë përballë një formacioni që kërkonte më shumë se ç’do gjë tjetër rrezultat për shkak të pozitave në tabelë.
Sa i përket takimit ndeshja nisi mjaft mirë për të besuarit e Ernest Gjokës, të cilët i shkuan disa herë pranë golit. Por Elbasani u tregua më cinik duke qëndruar në lojë madje goditi në momentin më të mirë të vendasve. Në fillimin e pjesës së dytë Elbasani gjeti e parë falë Lleshit, i cili përfitoi nga një largim i gabuar i mbrojtësit ekstrem të të Skënderbeut. Edhe goli i dytë erdhi po si pasojë e një gabimi të portierit vendas, i cili doli keq në një goditje këndi duke i dhënë mundësinë e artë Ze Gomesit për të dyfishuar shifrat.
