Ferrari po merr një pamje të re përpara fundjavës së Las Vegas (17-19 nëntor), e cila do të shënojë rikthimin e Formula 1 në "Qytetin e mëkatit" pas mbi 40 vitesh. Për këtë rast, SF-23 do të shfaqë detaje të bardha që kujtojnë mesin e viteve 70, epokën e artë të F1 në Shtetet e Bashkuara. Krahu i pasmë do të jetë më i dukshëm, por e bardha do të shfaqet edhe në kostumet dhe helmetat e Charles Leclerc dhe Carlos Sainz, siç ishte parashikuar tashmë nga skuadra e Maranello ditët e fundit.
Ferrari përjetoi disa nga momentet e tij më të paharrueshme në vitet e para të Formula 1 në Amerikë, me Niki Lauda, fitues i dy titujve botërorë (1975 dhe 1977) si dhe një Grand Prix në Watkins Glen në 1975, por edhe me Clay Regazzoni, së pari në Long Beach në 1976, Carlos Reutemann, mbret në Watkins Glen 1978, dhe me Gilles Villeneuve i cili në 1979 bëri garat e tij në Long Beach dhe Ëatkins Glen me legjendarin 312 T4.
Ato ditë, përveç të kuqes, në pjesën e pasme të Ferrarit kishte edhe shumë ngjyrë të bardhë, të cilën skuderia vendosi ta rizbulonte me rastin e rikthimit në Las Vegas. Themelore në krijimin e kësaj grafike të veçantë ishte bashkëpunimi me partnerët e skuderisës, të cilët ranë dakord të modifikonin ngjyrat e tyre për t'u përshtatur me projektin, dhe në veçanti me Puma-n që u kujdes për kostumet dhe uniformat e ekipit.
Hera e fundit që F1 garoi në Las Vegas ishte në vitin 1982 dhe fituesi ishte Michele Alboreto me Tyrrell. Edhe në atë kohë, si këtë vit, kalendari i kampionatit botëror përfshinte 3 GP në Shtetet e Bashkuara (Long Beach, Detroit dhe Vegas).
