Egnatia merr një triumf të jashtëzakonshëm, duke bërë goditjen e madhe në finalen e parë të luajtur në Kupën e Shqipërisë e duke fituar edhe trofeun e parë në historinë e klubit. Skuadra drejtuar nga Orges Shehi rezistoi deri në minutën e 114’ kur Jorgji akordoi një penallti në favor të rrogozhinasve. Jackson pa goditjen e tij të bllokohej nga Lika, por në topin e rikthyer nuk gaboi, duke nisur festën e Egnatias në Elbasan Arena. Më i kënaqur për këtë arritje është presidenti i klubit Agim Demrozi, pas ndeshjes numri një i klubit rrogozhinas do të shprehej.
“Nuk jam habitur nga ky sukses pasi e kam thënë tre vite më parë se do të arrojmë në kupat e europës. Ishim me fat këtë sezon pasi shkojmë në Ligën e Konferencës duke dituar edhe Kupën e Shqipërisë”, tha Agim Demrozi.
Goli i Jackson vulosi fatin e takimit dhe nisi festën. Egnatia tashmë është në librin e artë të kompeticionit dhe një meritë për këtë ka edhe trajneri Edlir Tetova. Tekniku durrsak u rikonfirmua në krye të stolit më 30 janar të këtij viti, dhe që nga ai moment në 24 ndeshje Tetova ka një bilanc pozitiv me 10 fitore 8 barazime e 6 humbje, por ajo që është më e rëndëishsme, është pjesëmarrja në Kupat e Europës dhe fitimi i Kupës së Shqipërisë.
“Kur nisëm punën në verë askush nuk besonte në këtë ekip. Sot jemi këtu dhe unë dua që të përshëndes të gjithë skeptikët”, tha Edlir Tetova.
