Nëntëdhjetë minuta me emocion. Edhe një javë e mbetur në kampionat, Seria A nuk e ka ende ekipin kampion. Milan apo Inter. Gjithçka do të vendoset të dielën e ardhshme. Në një San Siro kuqezi në festë, skuadra e Piolit dominon Atalantën, por nuk mjafton të shijojë tashmë kampionatin e 19-të: zikaltërit fituan në Cagliari dhe mbajnë gjallë garën për titull deri në fund, me -2 në renditje dhe përplasjet në disfavor, por me shpresën e një 5 maji ndryshe.
Sfida në distancë mes Milanit dhe Interit, të cilët ditën e fundit do të takohen përkatësisht kundër Sassuolos jashtë dhe në shtëpi kundër Sampdorias së shpëtuar matematikisht, sot ka më shumë se kurrë fytyrat e Rafael Leão dhe Lautaro Martinez. Me shpërthimin e golave në ndeshjet e fundit, sulmuesit portugez dhe argjentinas kanë bërë që skuadrat e tyre respektive të garojnë për titull deri në fund.
Nga një lojtar i paqëndrueshëm dhe jo shumë konkret përpara portës, Leão është bërë konstant dhe i pamëshirshëm me gjuajtjet e tij rrufe. Me golin ndaj Atalantës, ndeshje e tretë radhazi që shënon në San Siro për herë të parë në Serinë A, janë njëmbëdhjetë në këtë kampionat, një më pak se ato të arritura në dy sezonet e mëparshme. Në pesë ndeshjet e tij të fundit në Serie A ai ka marrë pjesë në gjashtë gola (tre gola, tre asistime): po aq sa në 19 të të mëparshme.
Nga ana tjetër, është një Lautaro Martinez që ka arritur 21 gola në kampionat dhe 25 në sezon. Toro është lojtari i gjashtë në historinë e Interit që ka arritur të shënojë 20 gola në një sezon të vetëm në Serie A para se të mbushë 25 vjeç, pas Giuseppe Meazza, Stefano Nyers, Antonio Angelillo, Ronaldo dhe Mauro Icardi. Që nga fillimi i marsit, ‘Toro’ ka qenë lojtari që ka shënuar më shumë gola në Serie A, dhjetë gola, nga të cilët gjashtë në gjashtë ndeshjet e fundit.
Një rilindje pas dy muajsh makthi midis tetorit dhe nëntorit. Një shpërthim golash që megjithatë mund të mos mjaftojë. "Unë do të riluaja ndeshjen me Bolonjën, ishte ndeshja më e rëndësishme - tha Lautaro pas fitores në Cagliari - Kishim një ndeshje më pak dhe po luanim mirë. Nëse ende e besojmë? Po, ka ende mundësi".
