Është mbyllur në barazim 1-1 sfida e luajtur në “Arena e Demave”, ajo mes Partizanit dhe Dinamos, e vlefshme për javën e 22-të të “Abissnet Superiore”, që erdhi për shikuesit në ekranin e RTSH Sport.
Në pjesën e parë, e kujdesshme për të dyja skuadrat, gjithçka mbeti e mbërthyer në shifrat 0-0, pavarësisht përpjekjeve, më shumë nga skuadra e Dinamos.
Në pjesën e dytë të besuarit e Ilir Dajës arritën të zhbllokojnë sfidën, pikërisht në minutën e 50-të me anë të Mandelës. Pas këtij momenti Dinamo u shfaq më e qartë në lojë, por në fund Partizani arriti të gjejë rrugën e rrjetës me anë të Bintsouka(90’+2).
Një barazim i arritur në limite, që nuk lejon shkëputjen e njërës apo tjetrës skuadre në klasifikim, duke mbetur në kushte të njëjta: Partizani në vend të parë me 38 pikë, ndjekur nga Dinamo po me 38 pikë.
