Federata e Futbollit e Kosovës ka zyrtarizuar ditën e sotme tre ndeshje miqësore që do të zhvillojnë “dardanët” në muajt në vazhdim. Kosova do të masë forcat me Armeninë dhe Hungarinë në transfertë në muajin mars, ndërsa në qershor “dardanët” do të sfidojnë Norvegjinë në Oslo.
“Kombëtarja e Kosovës ka aranzhuar tri ndeshje miqësore, dy për muajin mars dhe një për muajin qershor. Fillimisht më 22 mars, Dardanët do të luajnë kundër Armenisë në Yerevan, derisa më pas më 26 mars do të përballen me Hungarinë, në Budapest. Ndërkaq, testin e radhës, Kosova do ta ketë më 5 qershor, ku do të luajë kundër Norvegjisë, në Oslo.
Federata e Futbollit e Kosovës është në bisedime për aranzhimin edhe të miqësores së dytë për qershor dhe shumë shpejt do të konfirmohet edhe kundërshtari tjetër. Këto miqësore do të shërbejnë që ekipi dardan të përgatitet sa më mirë për ndeshjet zyrtare në vjeshtë në kuadër të Ligës së Kombeve, shorti i të cilës garë do të tërhiqet më 8 shkurt”, shkruhet në njoftimin e federatës kosovare të futbollit.
