Komisioni i Disiplinës nuk e ka kursyer skuadrën e Kukësit për shkak të sjelljes së gabuar të tifozëve gjatë ndeshjes së Kupës. Në numër të konsiderueshëm në shkallët e stadiumit, duke dhuruar një atmosferë të jashtëzakonshme, tifozët e verilindorëve në fakt nuk kanë nguruar të hedhin dhe sende në fushë gjatë ndeshjes me Teutën. Disiplina, e mbledhur sot, ka dhënë një gjobë prej 100 mijë lekësh. E njëjta masë, për të njëjtën arsye, është marrë dhe për skuadrën e Butrintit.
VENDIMET E PLOTA:
- FK Kukësi, për sjellje të gabuar të spektatorëve duke hedhur sende në terrenin sportiv, në bazë të nenit 65/1 dhe 65/3/c të KDS, dënohet me gjobë në masën 100.000 (njëqind mijë) lekë.
- KF Butrinti, për sjellje të gabuar të spektatorëve duke hedhur sende në terrenin sportiv, në bazë të nenit 65/1 dhe 65/3/c të KDS, dënohet me gjobë në masën 100.000 (njëqind mijë) lekë. Në zbatim të nenit 116/1/b të KDS, gjoba të aplikohet në masën 20%.
- Rrëzimin e kërkesës së lojtarit të AF Elbasani, Fabjan Tartari, si të pabazuar në Kodin e Disiplinës Sportive.
- Rrëzimin e kërkesës së Klubit të Futbollit Delvina sh.a, si të pabazuar në Kodin e Disiplinës Sportive.