Erzeni i ka shkaktuar Tiranës humbjen e parë në këtë fillim sezoni dhe pikërisht në “Selman Stërmasi”, në shtëpinë bardheblu, ku gjithçka u vendos në minutën e 17-të të takimit nga një gol i Maliqit.
Në këtë ndeshje hapëse të javës së pestë ishin bardheblutë që kishin kontrollin e topit, por u përplasën me murin mbrojtës të shijakasve, gjithmonë në lartësinë e duhur, duke zbehur çdo tentativë të kundërshtarit. U mbrojtën mirë dhe goditën në momentin e duhur me Maliqin, i cili shfrytëzoi një goditje që u kthye në assist për të dhe nuk u mendua dy herë për ta dërguar në rrjetë.
Reagimi bardheblu në asnjë moment nuk ishte në lartësinë e duhur, kjo dhe për meritë të kundërshtarit, që arriti të mbrohet si duhet deri në fund. Ndërkohë që në anën tjetër, portieri Lika ishte më shumë se një herë heroi bardheblu duke shpëtuar skuadrën nga pësimi i golit të dytë.
Një ditë jo për skuadrën bardheblu, në veçanti për sulmin, duke i dhënë mundësinë skuadrës së Erzenit të largohet me tri pikë nga “Selman Stërmasi”, që e ngjisin në kuotën e 8 pikëve. Tirana mbetet në kuotën e 10 pikëve, në pritje të rezultateve të ndeshjeve të tjera.
