Inter mundi Milanin 1-0 në javën e 21-të të Serisë A, duke konsoliduar vendin e dytë në renditje, duke kaluar në +5 nga një “Djall” që është gjithnjë e më në krizë dhe -13 nga lideri Napoli. Derbi i 178-të në Serie A u vendos nga një goditje me kokë e Lautaro Martinez në minutën e 34-të, duke sanksionuar dominimin absolut të zikaltërve në pjesën e parë, me kuqezinjtë që nuk gjuajtën asnjëherë në portë. Pjesa e dytë është më e ekuilibruar sepse Milani është më me iniciativë, por Onana nuk është asnjëherë në rrezik serioz. Për Inzaghin është fitorja e parë në derbin milanez në kampionat.
Pikërisht një vit më parë, fitorja në derbi i dha Milanit një pjesë të mirë të titullit, por 365 ditë më vonë muzika ka ndryshuar dhe sonte Interi konfirmoi epërsinë e qytetit tashmë të dukshme pas fitores në Superkupë. Fatkeqësisht për të dyja skuadrat, çështja e titullit tashmë duket e përfunduar, por ndeshja e mbrëmjes së sotme konfirmoi se skuadra e Inzaghit mund të jetë e vetmja kundër Napolit, ndërsa skuadra e Piolit thjesht nuk mund të dalë nga spiralja negative në të cilën u futën pas barazimit ndaj Romës. Një involucion nën sytë e të gjithëve dhe ndryshimi i modulit nuk mjaftoi për asgjë.
Suksesi i zikaltërve është i patëmetë sidomos për pjesën e parë të luajtur në mënyrë të shkëlqyer, në të cilën kushërinjtë nuk gjuajtën asnjëherë drejt portës. Një qëndrim tepër disfatist që në fund kushtoi shtrenjtë. I vetmi që shpëtoi veten mes kuqezinjve ishte më i kontestuari, pikërisht Tatarusanu i cili me tri pritje të mira shmangu një deficit më të madh. Heroi i Interit është Lautaro Martinez, edhe një herë vendimtar, por Inzaghi gjithashtu mund të buzëqeshë me qëndrueshmërinë e sapogjetur në mbrojtje, rikthimin e Brozovic në fushë dhe një Lukaku në rritje, i cili ishte afër shënimit në shtesë.
