Oktoberfesti është një nga festat më popullore dhe më të mëdha në Gjermani. Natyrisht, lajtmotivi kryesor i kësaj feste është birra, teksa përgjatë 16 apo 18 ditëve që zgjat ky eveniment që tërheq mbi 6 milionë turistë në Gjermani, konsumohen 7 deri në 8 milionë litra birrë.
Pjesë e këtij rituali është edhe Bajerni i Mynihut dhe klubi i famshmë bavarez ka publikuar edhe foton tradicionale me veshjen “Lederhosen”.
Sidoqoftë, në foton e këtij viti bie në sy fakti se vetëm dy nga 31 lojtarët e gjigandes bavareze nuk kanë në dorë gotat e famshme 3-litërshe të mbushura me birrë.
Bëhet fjalë për senegalezin Sadio Mane, i pari ulur në të djathtë të fotos, dhe marokenin Nusair Mazraui, i dyti majtas në rreshtin e 3-të më këmbë.
Të dy lojtarët janë besimtarë muslimanë praktikues dhe besimi islam e ndalon kategorikisht konsumimin e alkoolit. Për këtë arsye, Mane nuk ka gotë birre, ndërsa pëllëmbët e duarve i ka vendosur mbi gjunjë, ndërsa Mazraui i mban duart lidhur prapa.
Natyrisht, jetojmë në epokën e globalizimit dhe klubi bavarez e ka respektuar këtë të drejtë të dy lojtarëve të vet myslimanë, duke fituar njëkohësisht edhe respektin e miliona myslimanëve anembanë botës.
