Komisioni i Disiplinës në Federatën Shqiptare të Futbollit është treguar i butë me ekipet e Superiores dhe i ashpër me nivelin e inferiorëve duke nisur nga Kategoria e Parë e deri tek topkëmba amatore. Kështu në Abissnet Superiore, Kukësi është paralajmëruar se do të jetë subjekt i masave disiplinore nëse do të ketë përsëritje të sjelljes së gabuar të tifozëve.
Po kështu, pas asaj që ka ndodhur në përplasjen e tifozëve në tribunën e “Roza Haxhiut” në ndeshjen Lushnja – Luzi 2008, klubi verdhejeshil është paralajmëruar për të qenë subjekt i masave disiplinore nëse do të ketë përsëri sjellje të gabuar të sportdashësve. Dënohet me dy ndeshje zyrtari i Tërbunit, Andi Bobaj, për protestë ndaj vendimeve të zyrtarit të takimit.
Ndërkohë masat më të shumta ndëshkimore kanë qenë në Kategorinë e Dytë. Gjithçka nis zyrtarin e KF Valbona, Gazi Fuçia, i cili është pezulluar 8 ndeshje për sjellje jo sportive ndaj zyrtarit të ndeshjes. AF Luftëtari për sjellje të gabuar të tifozëve dhe hedhje të sendeve në fushën e lojës është gjobitur me 50.000 lekë të rinj. Por ndëshkimet më të ashpra kanë ardhur për ndeshjen Devolli – Labëria, atje ku fusha sportive e Bilishtit është pezulluar për pesë takime pasi ka patur hedhje të sendeve në terrenin e lojës dhe dështim në përmbushjen e detyrimeve dhe përgjegjësive, ndërsa kanë hyrë persona të palejuar brenda rrethimit të vendit ku po luhej ndeshja. Po kështu futbollistët e Devollit, Fabian Nallbati dhe Egli Malësia janë pezulluar nga 8-10 ndeshje për sjellje jo sportive ndaj kundërshtarit. Kurse tek Labëria, Xhulio Mirani dhe Albano Çaushaj për sjellje jo sportive dhe sulm ndaj kundërshtarit janë pezulluar 4-10 ndeshje.
Nuk kanë munguar ndëshkimet në ekipet e moshave U-13, U-17, U-19 dhe U-21, apo për skuadrat në Sunday League. Por ajo që është e rëndësishme është fakti se çdo javë ka të ndëshkuar në të gjitha nivelet e futbollit shqiptar, ndërsa situata nuk qetësohet asnjëherë.
VENDIMET E KOMISIONIT TË DISIPLINËS, 10 NËNTOR 2022
- FK Kukësi, në bazë të nenit 12 të KDS, paralajmërohet se në rast të përsëritjes së sjelljes së gabuar të spektatorëve, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
- FK Lushnja, në bazë të nenit 12 të KDS, paralajmërohet se në rast të përsëritjes së sjelljes së gabuar të spektatorëve, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
- Zyrtari i FK Tërbuni, Andri Bobaj, për protestë ndaj vendimeve të zyrtarit të ndeshjes, në bazë të nenit 55/1 të KDS, dënohet me 2 (dy) ndeshje pezullim nga aktiviteti.
- Zyrtari i KF Valbona, Gazi Fucia, për sjellje josportive ndaj zyrtarit të ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
- A.F Luftetari, për sjellje të gabuar të spektatorëve, hedhjen e sendeve në terrenin sportiv, në bazë të nenit 65/1, 65/3/a dhe 65/3/c të KDS, dënohet me gjobë në masën 50.000 (pesëdhjetë mijë) lekë. Në zbatim të nenit 116/1/b të KDS, gjoba të aplikohet në masën 20%.
- KF Devolli, për sjelljen e gabuar të spektatorëve duke hedhur sende brenda rrethimit të fushës si dhe dështim në përmbushjen e detyrimeve dhe përgjegjësive duke lejuar hyrjen brenda rrethimit të fushës të personave të pa autorizuar, që shkaktuan ndërprerje të përkohshme të lojës, në bazë të neneve 50, 63, 64/3/b dhe 65/3/c të KDS, dënohet me zhvillimin e 5 (pesë) ndeshjeve pa spektatorë në stadiumin përkatës si dhe gjobë në masën 200.000 (dyqind mijë) lekë.
- Lojtari i Laberia FC, Xhuliano Mirani, për sjellje josportive ndaj kundërshtarit, në bazë të nenit 47/1/d të KDS, dënohet me 4 (kater) ndeshje pezullim nga aktiviteti.
- Lojtari i KF Devolli, Fabian Nallbati, për sulm ndaj kundërshtarit, në bazë të nenit 47/1/e të KDS, dënohet me 10 (dhjetë) ndeshje pezullim nga aktiviteti.
- Lojtari i Laberia FC, Albano Caushaj për sulm ndaj kundërshtarit, në bazë të nenit 47/1/e të KDS, dënohet me 10 (dhjetë) ndeshje pezullim nga aktiviteti.
- Zyrtari i KF Devolli, Egli Malesia, për sjellje josportive ndaj zyrtarit të ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga aktiviteti.
- FK Kukësi U19, për braktisjen e ndeshjes së vlefshme për Kampionatin Kombëtar të Kategorisë së Parë U-19, kundër KF Bylis U19, në bazë të nenit 54/1 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
- FK Kukësi U17, për braktisjen e ndeshjes së vlefshme për Kampionatin Kombëtar të Kategorisë së Parë U-17, kundër KF Bylis U17, në bazë të nenit 54/1 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
- FK Kukësi U13, për braktisjen e ndeshjes së vlefshme për Kampionatin Kombëtar të Kategorisë së Parë U-13, kundër KF Bylis U13, në bazë të nenit 54/1 të KDS, humbet ndeshjen në tavolinë me rezultatin 3-0 dhe i zbriten 3 pikë nga klasifikimi.
- Zyrtari i FK Vora, Ardit Gjikola, për sjellje josportive ndaj zyrtarit të ndeshjes, në bazë të nenit 48/2/a të KDS, dënohet me 8 (tetë) ndeshje pezullim nga aktiviteti. Në aplikim të nenit 32/2/3 të KDS, vendoset pezullimi i pjesshëm i zbatimit të dënimit pas shlyerjes së gjysmës së tij. Periudha e pezullimit me kusht, në zbatim të nenit 32/4 të KDS, do të jetë 6 (gjashtë) muaj.
- Lojtari i FK Dinamo U21, Arben Demaj, për sulm ndaj kundërshtarit, në bazë të nenit 47/1/e të KDS, dënohet me 5 (pesë) ndeshje pezullim nga aktiviteti.
- Lojtari i Oktapus Security, FSHF Sunday League, Armand Qoshja, për sulm ndaj kundërshtarit, në bazë të nenit 47/1/e të KDS, dënohet me 8 (tetë) ndeshje pezullim nga aktiviteti. Në aplikim të nenit 32/2/3 të KDS, vendoset pezullimi i pjesshëm i zbatimit të dënimit pas shlyerjes së gjysmës së tij. Periudha e pezullimit me kusht, në zbatim të nenit 32/4 të KDS, do të jetë 6 (gjashtë) muaj.
- Lojtari i Primo, FSHF Sunday League, Elton Lame, për sjellje josportive ndaj kundërshtarit, në bazë të Nenit 47/1/d të KDS dënohet me 2 (dy) ndeshje pezullim nga aktiviteti futbollistik.
- Lojtari i Oktapus Security, FSHF Sunday League, Arben Demaj, për sulm ndaj kundërshtarit, në bazë të nenit 47/1/e të KDS, dënohet me 8 (tetë) ndeshje pezullim nga aktiviteti. Në aplikim të nenit 32/2/3 të KDS, vendoset pezullimi i pjesshëm i zbatimit të dënimit pas shlyerjes së gjysmës së tij. Periudha e pezullimit me kusht, në zbatim të nenit 32/4 të KDS, do të jetë 6 (gjashtë) muaj.
- Lojtari i Primo, FSHF Sunday League, Jasin Rrahmani, për sulm ndaj kundërshtarit, në bazë të nenit 47/1/e të KDS, dënohet me 8 (tetë) ndeshje pezullim nga aktiviteti. Në aplikim të nenit 32/2/3 të KDS, vendoset pezullimi i pjesshëm i zbatimit të dënimit pas shlyerjes së gjysmës së tij. Periudha e pezullimit me kusht, në zbatim të nenit 32/4 të KDS, do të jetë 6 (gjashtë) muaj.