Gati dy javë pas startit të përgatitjeve, formacioni i Hose Murinjos ka nisur të skicohet, dhe bashkë me të edhe lojtarët që nuk bëjnë pjesë në planet e portugezit tek Roma.
Sipas mediave italiane, ish-tekniku i Totenham po mendon të largojë nga skuadra mbrojtësin Kris Smolling, pikërisht benjamini i ish-trajnerit Fonseka, i cili këmbënguli jo pak në blerjen e lojtarit pas përfundimit të huazimit nga Junajtid.
Tashmë me Murinjon në stol 31-vjeçari nuk shihet më si titullar i padiskutueshëm, pasi në sytë e portugezit po gjen gjithnjë e më tepër hapësirë mbrojtësi shqiptar, Marash Kumbulla.
Ky i fundit shënoi edhe një gol në një prej takimeve përgatitoter, të cilat Roma i ka fituar me goleadë.
Me largimin e mundshëm të Smolling, destinacioni mbetet rikthimi në Premier League, ku janë të shumta klubet e interesuara.
Kjo lëvizje në merkato vjen si dhuratë për Kumbullën, i cili tashmë do të duhet të rivalizojë me emra si Ibanjez, Mancini apo veterani Fazio.
Këta janë 4 qendërmbrojtësit që pritet të ketë në dispozicion Murinjo, dhe një i pestë si Smolling shihet i tepërt.