Superliga e Kosovës ka zbritur sot në fushën e lojës me dy sfida, ku sigurisht e gjithë vëmendja ishte e përqëndruar në sfidën mes Ballkanit dhe Prishtinës, për vetë pozitat e dy skuadrave në tabelën e klasifikimit. Kryeqytetasit kanë arritur të triumfojnë në këtë sfidë me rezultatin 1-0. Gjithçka është vendosur në minutën e 35-të të sfidës, kur Thaqi ka shkaktuar një autogol duke ndëshkuar Ballkanin.
Për Prishtinën kjo është fitorja e shtatë si udhëtuese në këtë kampionat, ndërsa Ballkani pësoi disfatën e dytë në shtëpi, është mposhtur edhe nga Gjilani. Bardhekaltrit janë të pozicionuar në vendin e tretë në klasifikim me 54 pikë, një më pak se Ballkani i vendit të dytë.
Në sfidën tjetër, Feronikeli ka arritur një fitore bindëse ndaj Llapit me rezultatin 4-0. Për skuadrën nga Drenasi shënuan Milickovq(dopietë), Simonovski dhe Dabiqaj. Kjo fitore e vendos Feronikelin në vendin e pestë me 34 pikë, një më shumë se Llapi i vendit të gjashtë.
