Gara e 13-të e këtij sezoni të Formulës 1, Çmimi i Madh i Hungarisë, ka kurorëzuar si fitues Maks Verstapenin, i cili u nis nga vendi i 10-të, por pati si aleat të papritur gafën në strategjinë e “Ferrari”-t, që u kushtoi shtrenjt pilotëve të tij. Xhorxh Rasëlli u nis, për herë të parë në karrierë, nga vendi i parë me “Mercedes”-in e tij, por e gjeti veten nën sulmin e vazhdueshëm të Sharl Lëklerkut, i cili sidoqoftë arriti të marrë kryesimin me një parakalim të bukur në kthesën e parë të xhiros së 31-të. Por gjasat për një fitore të pilotit të ri nga Montekarlo morën një goditje fatale 9 xhiro më pas, kur drejtuesit e garës së “Ferrari”-t zgjodhën të vendosnin gomat e forta, edhe pse ishte vërejtur që skuadra “Alpine”, po vuante me këto goma.
Ndërkaq, ndonëse u nis nga vendi i 10-të, rivali për titull dhe kryesuesi i shkëputur i renditjes së përgjithshme të pilotëve, Verstapen, i cili ishte detyruar të ndërronte motorin e makinës pas dështimit në provat zyrtare të së shtunës, e mori shtruar, por qëndrueshëm garën dhe dalëngadalë, ia doli që, në xhiron e 53-të të merrte kryesimin e saj.
Më pas nuk pati më histori për pilotin holandez të “Red Bull”-it, që korri fitoren e 10-të të sezonit, ndërsa polidumin e plotësuan dy pilotët e “Mercedes”-it, Ljuis Hemilton dhe Xhorxh Rasëll, ndërsa Karlos Sainz mori vendin e 4-t dhe Sharl Lëklerk atë të 6-të për “Ferrari”-n. Serxhio Perez i “Red Bull”-it mori vendin e 5-të ndërsa 10-shen e pikëve e plotësuan Lando Norris, Fernando Alonso, Esteban Okon dhe Sebastian Fetel.