Vora është fituese zyrtare e grupit A të Kategorisë së Dytë, teksa sezonin e ardhshëm do të luajë në të Parën. Në ndeshjen e fundit, që ka ardhur drejtpërsëdrejti në rrjetin e Radio Televizionit Shqiptar, Vora ka mundur 2-0 Murlanin.
Në fakt ishte një ndeshje në të cilën nuk kishte rëndësi rezultati, por që u luajt sikur të ishte takimi që vendoste gjithçka. Murlani ka qenë i rrezikshëm në kundërsulm, ndërsa në të 32’, Kacubela ka goditur traun e portës së Vorës. Një minutë më vonë Vora gjen qetësinë me golin e Fatmir Prengës. Fundi i pjesës së parë shënon një goditje shtylle nga Vora, kjo me anë të Rraboshtës, i cili nuk ka gjetur dot golin e dytë.
Pjesa e dytë nis me njëmbëdhjetëmetërsh për Vorën, kjo pas pengimit të Rraboshtës. Por Jata, që iu dha mundësia për të qenë shënues, e dërgon topin jashtë. Dhjetë minuta më vonë situatat rrokullisen dhe penallti për Murlanin. Djepaxhia ndalet nga Jata. E vjen një penallti e tretë e akorduar nga Enis Dishani, i cili ka parë një tjetër pengim të Rraboshtës nga mbrojtja e Murlani. Përsëri Jata, që këtë herë shënon në të majtë të Tafës. Në vërshëllimën e fundit të Dishanit, 2-0 për Vorën, kurse në stadium nisi festa. Kupën kapitenit të Vorës, Isli Hidit, ia ka dorëzuar legjenda e futbollit dinamovit dhe atij kombëtar, Sulejman Demollari.
Në ndeshjet e tjera të grupit A, Naftëtari ka fituar 2-0 me Shënkollin; Iliria, 10-4 me Bulqizën; Gramshi, 4-1 me Adën dhe Valbona, 4-0 me Sopotin. Në Play-off për t’u ngjitur në Kategorinë e Parë, Veleçiku – Naftëtari dhe Valbona – Sopoti, kurse Bulqiza e Ada bien në Kategorinë e Tretë. Kështu grupi A mbyll sezonin, ndërsa e enjtja është për grupin B dhe më 11 maj finalja për titull kampion mes Vorës e Elbasanit.
