Nuk ka paqe tek Tirana dhe, pas largimit të ndjekur nga polemikat dhe mosmarrëveshjet të ish-trajnerit Orges Shehi, që e ka paditur klubin bardheblu sa u përket, sipas tij, detyrimeve të pashlyera, të martën ka ardhur një tjetër largim i bujshëm. Kështu, Tefik Osmani nuk është më drejtori sportiv i Tiranës dhe lajmi është bërë i ditur nga vetë ai përmes një postimi në profilin e tij në rrjetin social “Instagram”.
“Rrugëtimit tim të mrekullueshëm me KF Tiranën i erdhi fundi, - shkruan ish-futbollisti në postimin e tij, duke vijuar: “Është ekipi që më dha shumë emocione, sfida dhe mdihem krenar që isha pjesë e këtij klubi të madh. Falënderoj familjen Halili, stafin, lojtarët e mrekullueshëm gjatë 3 viteve ku ndamë gëzime dhe lot. Tifozët e mrekullueshëm që mbështesin ekipin e tyre në çdo rast. Jam krenar që m’u dha mundësia të shkruam me modesti emrin tim në këtë klub të madh”, - përfundon Tefik Osmani.
Në fakt, ai largohet në një moment të vështirë për klubin bardheblu, i cili nuk po merr rezultatet e duhura duke qenë shumë larg kreut të renditjes dhe me një ecuri të pakënaqshme në këtë gjysmë të parë të këtij sezoni të Kategorisë Superiore.
