Ditën e premte është hedhur shorti për fazën Play Off të botërorit Katar 2022, teksa goglat janë treguar të pamëshirshme me Italinë e Portugalinë. Të dyja janë në të njëjtin grup dhe vetëm njëra prej tyre do t’ia dalë të shkojë në Katar, duke e bërë më emocionuese fazën Play off.
Në vazon C, kampionët e Europës duhet të kalojnë fillimisht Maqedoninë e Veriut dhe më pas në finale do të luajnë ndaj Portugalisë ose Turqisë, por ajo që ndoshta mund të dëmtojë Kombëtaren e Mançinit është se finalja do të luhet në transfertë dhe jo në Itali.
Në vazon A dy gjysmëfinalet do të jenë Skoci-Ukrainë dhe Uells Austri, ndërsa në Vazon B do të luhen dy takime interesante ku nuk ka favoritë si Rusi-Poloni dhe Suedi-Republikë Çeke. Gjysmëfinalet e Play Off-it të Katar 2022 do të luhen më 24 mars, ndërsa 5 ditë më vonë, do të luhen finalet, ku edhe do të përcaktohen tre skuadrat e fundit që do të garojnë në Botërorin e ardhshëm.
Çiftet (gjysmëfinalet 24 mars; finalet 29 mars)
Gjysmëfinalja 1: Skoci-Ukrainë
Gjysmëfinalja 2: Uells-Austri
Finalja: Fituesi 2 - Fituesi 1
Gjysmëfinalja 3: Rusi-Poloni
Gjysmëfinalja 4: Suedi-Rep. Çeke
Finalja: Fituesi 3- Fituesi 4
Gjysmëfinalja 5: Itali-Maqedonia e Veriut
Gjysmëfinalja 6: Portugali-Turqi
Finalja: Fituesi 6 - Fituesi 5
Raundi i dyfishtë i playoff-it do të luhet në një ndeshje të vetme, gjysmëfinalja në shtëpinë e kombëtares me renditjen më të mirë të FIFA-s (nëntëdhjetë minuta dhe mundësisht shtesë dhe penallti).
Gjysmëfinalja do të luhet më 24 mars 2022 ndërsa aktet finale, të kombinuara me gjysmëfinalet tashmë në momentin e shortit, do të luhen më 29 mars në shtëpinë e njërit prej dy pretendentëve në bazë të shortit.
Ukraina dhe Rusia nuk mund të çiftohen me short.
