Të hënën do të luhen dy takimet e fundit të javës së 14-të të Kategorisë së Parë, sfida që do të transmetohen në rrjetin e Radio Televizionit Shqiptar.
Një duel direkt për kreun do të luhet në Vorë, aty ku vendasit e drejtuar nga Bellai do të masin forcat me kryesuesit e Flamurtarit. Vetëm një pikë ndan dy skuadrat në tabelën e klasifikimit, prandaj sfida e nesërme premton spektakël në RTSH Sport në orën 13:30.
Besa, kërkon të përfitojë nga kjo përballje direkte e rivalëve, duke synuar maksimumin e pikëve përballë Pogradecit. Kjo ndeshje do të transmetohet nesër në orën 13:30 në RTSH 2.
Kujtojmë që të shtunën u luajtën 4 takime të javës së 14-të në Kategorinë e Parë. Kukësi fitoi 3-2 në Fier përballë Apolonisë, ndërsa Lushnja mundi 2-0 në “Roza Haxhiu” Kastriotin.
Erzeni barazoi 1-1 në shtëpi përballë Valbonës, ndërsa në barazim pa gola 0-0 u mbyll sfida Burreli-Korabi.
