Janë luajtur sot dy ndeshjet e parë të javës së 6-të në Abissnet Superiore. Laçi ka arritur të gjejë fitoren e parë në këtë sezon, duke mundur 1-0 Kastriotin. Po 1-0 është dhe fitorja e Teutës përballë Egnatias.
Me trajnerin e ri në stol, Sero Noka, Laçi ka arritur të fitojë minimalisht në transfertën me Kastriotin falë një goli të shënuar nga Mazrekaj në minutën e 72-të. Një sfidë e luftuar nga të dyja skuadrat, ku nuk kanë munguar dhe rastet për shënim.
Gjithsesi, në fund fati u ka buzëqeshur kurbinasve, të cilët kanë arritur të marrin dhe fitoren e parë në këtë edicion të Superiores.
Rikthim te fitorja dhe për skuadrën e Teutës, e cila pas disfatës së pësuar në javën e kaluar përballë Kukësit, arrin të gjejë buzëqeshjen duke mundur Egnatian me rezultatin 1-0.
Është dashur të pritet plotë 80 minuta në këtë sfidë, që në skenë të ngjitet goli i vetëm me firmën e Kallakut. Në fakt ishte një penallti e fituar nga Gruda, që është tranformuar në gol nga Kallaku, duke i dhënë skuadrës së Martinit tri pikë.