Pasi ka mbyllur fazën e sezonit të rregullt, aty ku morën pjesë 6 skuadrat më të mira të të dy anëve të kufirit shqiptar, veprimtaria e përbashkët të basketbollit për femra midis Shqipërisë dhe Kosovës, Liga Unike, ka nisur të hënën në Prishtinë fazën e saj finale, teksa janë zhvilluar dy takimet gjysmëfinale. Kështu, takimi i parë i së hënës në mbrëmje ka qenë ai midis Bashkimit të Prizrenit dhe Tiranës. Skuadra nga Kosova e mbylli sezonin e rregullt me 10 fitore në po aq javë, ndërsa Tirana ishte e vetmja skuadër e mbetur nga Shqipëria në këtë “4-she finale”.
Por Tirana e ka nisur më mirë takimin, duke e fituar 10-minutëshin e parë me 3 pikë epërsi, 16-13. Por skuadra prizrenase do të kundërpërgjigjet në 10-minutëshin e dytë, që, ashtu si edhe ai pari, ka qenë i luftuar, duke e fituar atë me shifrat 18-15, dhe duke bërë që të dy ekipet të shkojnë në pushimin e madh midis dy gjysmave me epërsinë e minimale prej vetëm një pike të skuadrës së Bashkimit 31-30.
Të dyja skuadrat kanë dalë njëlloj të motivuara nga dhomat e zhveshjeve dhe 10-minutëshi i 3-të ka qenë edhe më i luftuar dhe i barazpeshuar dhe është mbyllur po ashtu në barazi 16-16, duke bërë që Bashkimi sidoqoftë të kryesojë kështu pas një gjysmë ore lojë me vetëm një pikë epërsi, 47-46.
Por 10-minutëshi i 4-t dhe i fundit ka parë skuadrën nga Prizreni të tregohet e saktë, përballë një Tirane që gabon dhe shënon shumë pak, vetëm 6 pikë, kundrejt 26 pikëve të Bashkimi, që e fiton kështu gjithë ndeshjen 73-54, duke siguruar vendin në finalen e Ligës Unike në basketboll për femra.
