Flamurtari në basketboll për femra ka pësuar një tjetër humbje në kryeqytet e kjo në harkun kohor të tre ditëve. Pas Partizanit në Superkupën e Shqipërisë, tanimë është Tirana, e cila për llogari të kampionatit, triumfon ndaj vlonjateve, 60-59, në ndeshjen e ardhur drejtpërsëdrejti në rrjetin e Radio Televizionit Shqiptar. Perioda e parë është 17-13 për Tiranën. Bardheblutë e Mirza Alibegajt ruajtën të njëjtin ritëm dhe në periodën e dytë, që e fituan 15-13 dhe në pushim kanë kryesuar 32-26. Pas pushimit Flamurtari mundohet të rekuperojë në rezultat. 15-17 perioda e tretë për vlonjatet, që afrohen në 47-43. Luftohet fort në periodën e katërt, që Flamurtari e ka fituar 13-16, por në përfundim 60-59 për Tiranën. Në përfundim të ndeshjes për mikrofonin e Radio Televizionit Shqiptar kanë ardhur trajneri i Flamurtarit, Agim Dalipi, dhe ajo e Tiranës, Mirza Alibegaj
"Pas një stërmundimi në Superkupën e Shqipërisë në ndeshjen me Partizanin, e cila ndikoi shumë në gjendjen fizike të skuadrës, erdhi kjo sfidë me Tiranën. Sado që u munduam të rigjeneronim forcat e skuadrës fusha tregoi që skuadra nuk ishte plotësisht në gjendjen optimale fizike. Dhe në këtë rast na ndëshkoi kalendari", thotë Agim Dalipi pas ndeshjes.
"Ekipi i Flamurtarit dihet që është një ekip shumë i mirë. Është ndër pretendentët kryesorë të kampionatit. Është pretendent prej vitesh dhe dihen cilësitë e tij. Patjetër që me Flamurtarin nuk mund të lirohesh. Duhet të lirohesh në mënyrë të atillë siç bëmë ne që nga 12 pikë diferencë të paktën e ruajtëm fitoren me një pikë diferencë", pohon Mirza Alibegaj.