Ky sezon i nivelit më të lartë të Kampionatit Kombëtar të Futbollit, Kategorisë Superiore, është karakterizuar nga rivaliteti, teksa skuadrat i kanë marrë pikë njëra-tjetrës dhe Tirana kryesuese ka grumbulluar 21 pikë nga 30 të mundshme në këto 10 javë të para, ndërsa 10 pikë i ndajnë skuadrat nga vendi i parë në atë të 8-tin. Përkatësisht edhe numri i golave të shënuar ka lënë për të dëshiruar dhe shënuesi më i mirë pas këtyre 10 javëve të para është sulmuesi i Kukësit, Edi Basha, me 6 gola, i ndjekur nga dy shqiptarët e lindur në Maqedoninë e Veriut, Agim Ibraimi i Dinamos dhe Taulant Seferi i Tiranës.
Përtej këtij fakti, sa u përket pasaportave, goli në Superiore flet shumë pak shqip. Duke i hedhur një vështrim të shpejtë listës së 15 shënuesve më të mirë, vetëm 5 prej tyre janë shqipfolës, por vetëm 3 prej tyre kanë pasaportë shqiptare. Taulant Seferi, që ndan vendin dytë dhe të 3-të me Ibraimin, me nga 5 gola, ka lindur në Kumanovë, por mban pasaportë shqiptare dhe ka luajtur me përfaqësuesen kuqezi.
Ndërsa Ibraimi, i lindur në Tetovë, ka pasaportën e Maqedonisë së Veriut, me përfaqësuesen e së cilës edhe ka luajtur. Në vendin e 6-të gjendet Tedi Cara i Partizanit, ndërsa në të 9-tin Redon Xhixha i Tiranës, me të dy futbollistët shqiptarë që kanë realizuar nga 4 gola secili, ndërsa shqipfolësi tjetër, por që mban pasaportën gjermane, është Vesel Limaj i Tiranës, që ka realizuar 3 gola.
Interesant është fakti që përveç 3 prej shënuesve më të mirë në 15-shen e parë të Superiores që janë shqiptar, po aq janë brazilianë e po aq janë afrikanë, ndërsa dy të tjerë janë kroatë. Listën e plotëson Maqedonia e Veriut, Mali i Zi Serbia dhe Gjermania. Ndërkaq, Ibraimi, Seferi dhe Cara janë shënuesit më të mirë të pjesëve të para, kurse “mbreti i 11-metërshve” është Stenio Zhunjor i Partizanit, që të 3 golat e tij i ka realizuar nga pika e bardhë, i ndjekur nga Ibraimi me dy.
Golashënuesit më të mirë pas 10 ndeshjeve
Nr. Lojtari Klubi Gola 11-m. Pj. e parë
- E. Basha Kukësi 6 0 2
- A. Ibraimi Dinamo 5 2 4
- T. Seferi Tirana 5 1 4
- A. Aralica Vllaznia 4 0 1
- Pedro Augusto Egnatia 4 1 3
- T. Cara Partizani 4 0 4
- Viktor Da Silva Vllaznia 4 0 3
- L. Milunović Kukësi 4 0 2
- R. Xhixha Tirana 4 0 2
- D. Zarubica Laçi 4 0 2
- S. Çinedu Dinamo 3 0 2
- Stênio Zhúnior Partizani 3 3 3
- S. Guindo Laçi 3 1 1
- V. Limaj Tirana 3 1 1
- A. Mensah Skënderbeu 3 0 1
